ភ្នំពេញ: នៅព្រឹកថ្ងៃចន្ទ ទី១៩ ខែកក្កដា ឆ្នាំ២០២១ កម្ពុជាបាននាំជំនួយម៉ាសនិងម៉ាស៊ីនផលិតអុកស៊ីហ្សែន តាមយន្តហោះពិសេស ខេមបូឌា អ៊ែរវេ ជូនដល់រដ្ឋាភិបាលវៀតណាម។
លោកស្រី យក់ សម្បត្តិ រដ្ឋលេខាធិការក្រសួងសុខាភិបាល តំណាងនាយករដ្ឋមន្ត្រីកម្ពុជាសម្តេចតេជោ ហ៊ុន សែន បាននាំយកជំនួយទាំងនេះ ទៅជូនវៀតណាម នៅអាកាសយានដ្ឋាន ទីក្រុងហូជីមិញ។
ជំនួយរបស់រាជរដ្ឋាភិបាល និងប្រជាជននៃព្រះរាជាណាចក្រកម្ពុជា នាពេលនេះដើម្បីជួយក្នុងការទប់ស្កាត់ការរាលដាលនៃជំងឺកូវីដ-១៩ ចូលក្នុងសហគមន៍នៃទីក្រុងហូជីមិញ សាធារណរដ្ឋសង្គមនិយមវៀតណាម។
ជំនួយរបស់កម្ពុជា ជូនវៀតណាម នាពេលនេះរួមមាន៖ ម៉ាសធម្មតា ១លានម៉ាស ម៉ាសវេជ្ជសាស្ត្រ ១សែនម៉ាស និងម៉ាស៊ីនផលិតអុកស៊ីហ្សែន ១០០គ្រឿង។ ក្រៅពីឧបករណ៍សម្ភារៈវេជ្ជសាស្ត្រទាំងនេះកម្ពុជា ក៏បានផ្តល់ជូនវៀតណាម នូវថវិកាសរុប ៣៥ម៉ឺនដុល្លារថែមទៀត។ ក្នុងនោះ រួមមាន៖ ២០ម៉ឺនដុល្លារ ជាអំណោយរបស់រាជរដ្ឋាភិបាលកម្ពុជា ១០ម៉ឺនដុល្លារ ជាអំណោយរបស់កាកបាទក្រហមកម្ពុជា និង៥ម៉ឺនដុល្លារ ជាជំនួយរបស់សមាគមមិត្តភាពកម្ពុជា-វៀតណាម។
កន្លងមក កម្ពុជាបានផ្តល់ជំនួយជាសម្ភារៈបរិក្ខារពេទ្យ ពិសេសម៉ាសរាប់លានដល់ប្រទេសជាច្រើន រួមមាន ឡាវ, មីយ៉ាន់ម៉ា, ទីម័រឡេស្ត និងប្រទេសនេប៉ាល់។ គិតត្រឹមព្រឹកថ្ងៃទី១៩ ខែកក្កដា ឆ្នាំ២០២១ នៅទូទាំងប្រទេសវៀតណាម មានករណីឆ្លងកូវីដ-១៩ សរុបចំនួន ៥៣៨៣០នាក់, ស្លាប់ ២៥៤នាក់, ជាសះស្បើយ ១០៦៦៧នាក់៕
